Isumat.com/8:25AM, October 27, 2020
Waray pagpasibay-i han gobyerno an mga sibilyan nga na-angyanan han panggama nga binuhatan han mga rebelde nga NPA ha Borongan City, Eastern Samar hadton nag-agi nga tuig.
An gobyerno pinaagi han Department of Trade an Industry (DTI) an naghatag hin hinabang ngadto han mga nabiktima han ambush ha Brgy Libuton, Borongan hadton Disyembre 2019. Dida han report han Philippine Information Agency-8, an DTI-Eastern Samar in naghatag hin 5 Mil kantidad hin grocery items ngadto kan Carlito Baldos basi magtikang han iya pagbaligya.
Naka-agom gihapon hin ayuda an mga taga San Julian nga hira Christian Godina, Marvaliant Santos, Francis Vee Radam, ngan Florence Traboco. An mga pamilya han nagkamamatay nga hira Mary Grace Rapada ngan Silvina Traboco an nakatagamtam gihapon han bulig.
Nagpahayag an DTI nga ini nga pitad in nahimugso pinaagi han Livelihood Seeding Program-Pangkabuhayan sa Pagbangon at Ginhawa (LSP-PBG). Ini in may panuyo nga buligan makatindog ha ira pakabuhi an mga biktima hin kalamidad, trahedya ngan bayolente nga panhitabo.
Ha ilarum han programa, an DTI amo gihapon an magtututdo han mga benefeciario han mga paagi basi magin ma-inuswagon an pagpakubuhi han mga naka-agom.
Hadton Disyembre 2019, an mga komunista nga rebelde in nag-ambush hin police car luran an mga kapulisan tikang han Police Mobile Battalion ha Dolores nga tikadto ha Borongan City ha Brgy Libuton. Usa nga pulis an naawat an kinabuhi.
Iginkatuman nga dida han pagpabuto han mga rebelde, may mga sibilyan nga naagi han kalsada sanglit an iba ha ira an nagka-iigo han bala ngan landmine nga igintanom han mga NPA. #
