(File photo by Getty Images)

Isumat.com/7:19AM, October 29, 2020

Sobra 30 nga mga indibiduwal nga nagtatrabaho ha gobyerno an nagkasisikmit han Philippine Drug Enforcement Agency (PDEA) ha mga operasyon kontra han iligal nga droga ha Eastern Visayas han nag-agi nga duha ka bulan.

Iginpasamwak ni PDEA Regional Director Gilbert Buenafe dida han iya Media Briefing ha Philippine Information Agency nga 2 nga Uniformed Personnel, 20 nga empleyado ha gobyerno ngan 10 nga mga elected officials sugad han Municipal Councilor, Brgy Kapitan ngan Kagawad an ira nagkadadakop tungod han paghilambigit han droga.

Kasumpay hini, iginsampa na gihapon an kaangayan nga mga kaso kontra ha ira, pahayag pa ni Buenafe.

Igindugang pa han opisyal nga dida han sobra 4 Mil nga mga barangay ha Sinirangan Bisayas, 219 pa an ira gintutudlok nga mayda pa aktibidad han iligal nga droga. An iba in “Drug-Cleared” na. Pero ginklaro ni Buenafe nga mayda nalimpyuhan na nga mga barangay nga posible mahibalik ha “Not-Cleared” tungod kay may mga tawo nga umundang na hadto han iligal nga operasyon pero gintatahapan nga nagbabaligya na liwat yana han droga.

Dida han 435 nga mga operasyon han PDEA-8 yana nga Oktubre, naka-aresto hira hin 456 nga mga suspetsado kun diin 36 an kababayen-an ug an iba ha ira in menor-de-edad. Duha gihapon nga drug dens ha Tacloban City an nabungkag han ahensya. Mayda liwat drug den ha Ormoc nga nagseserbe nga Sex Den an ginronda han PDEA.

Iginbuyagyag gihapon ni Buenafe nga naghitaas an pag-gamit hin marijuana ha Region 8 dara kay waray makakabiyahe an mga pushers sanglit an iba nagtanom han nasabi nga droga. Usa na hini an narekupo nga plantasyon hin marijuana ha Albuera, Leyte nga igintanom han suspetsado ha iya natad.

Nagsering hi Buenafe nga mga drayber han habal-habal an parokyano han suspetsado.

Han yana nga bulan, an PDEA-8 in nakakumpiskar hin 802 gramos nga shabu ngan 399 gramos han marijuana. #