Isumat.com/ Nobyembre 10, 2022
Waray na makadangat ngadto han iya trabaho in usa nga pulis han bawi-an hiya hin kinabuhi han ma-aksidente samtang nagmamaneho han iya motorsiklo ha national highway Brgy Pilit, Sta Fe, Leyte, Nobyembre 9, 2022 han gab-i.
Ha report han kapulinsa, ginkilala an biktima nga hi Staff Sgt Gary Cabujoc, nakadestino ha PNP Regional Officer ngan nag-uukoy ha Barugo Leyte.
Ha inisyal nga imbestigasyon, natabo an insidente alas 7:45 han gab-i. Hi Cabujoc in nagmamaneho han iya motorsiklo tikang ha Barugo tikadto han iya trabaho ha PNP Regional Office.
Gintotoohan nga an kama-uran hadto nga takna ngan kamasirom han kalsada an hinungdan nga aksidente mabunggu-an han biktima an poste hin kuryente nga nakatindog ha outer lane han highway. Tungod han pagbunggo, nawarayan kontrol ha manibela an biktima ngan nahulog ha kanal ha ligid han kalsada.
An biktima in nag-antos hin grabe nga injuries ha magkalainlain nga parte han iya lawas ngan kadagmitan gindara ha usa nga hospital ha Palo, Leyte pero igindeklarar han doktor nga dead on arrival. #
