Usa nga langyawanon in sikat yana ha internet kay nag-viral na an video kun diin ginsita hiya ha usa nga checkpoint ha Tacloban City kun diin nagpakita hiya hin pagigin arogante ngan iya pa gintuprahan an mga opisyal han barangay nga nagdudumara han checkpoint.
Dida han Marso 22, ini nga foreigner in ginpaki-anhan han mga opisyal han Brgy 33 ha may Paterno nga kalsada han Tacloban kun kay-ano nga nagpapasoy-pasoy hiya ha kalsada nga waray sul-ot nga face mask. Iginmando man gud han City Government nga an ngatanan nga magawas ha balay in kinahanglan naka face mask.
Nagyinawyawon lugod an banyaga ug sugad sugad nga iya ginmemenos an mga pitad han gobyerno kontra han COVID-19. Dida han video, mababati-an nga nagsering an langyawanon nga bisan ano pa an buhaton magkakamagtay man la gihapon. Ginsasagdunan unta hiya nga sumunod han mga kamanduan han gobyerno pero nagpadayon ini pagyinakan hin deri maupay nga mga pulong.
Antis pa gud hiya lumakat, iya gintuprahan an mga opisyal dida han checkpoint, maupay nala nga distansyado hira tikang han foreigner.
Sumala han Abucay Police Station, ini nga foreigner in mayda na kaso han una kay nagtampalo hiya hin tawo nga iya la iginkatapo ha kalsada. Tobtob nga ginsusurat ini nga notisya, waray pa magsampa hin pormal nga reklamo an barangay officials.
Dida han blotter han police, waray pag ngarani an nasabi nga langyawanon. Nagpahayag an PNP nga puede ini kasuhan dara kay an iya ginbuhat amo in deri pagsugot han kamanduan hin otorisado nga mga opisyal. #
