Isumat.com/7:31AM, Abri; 23, 2021
Katapos makig-irignom ha iya mga paryente, usa nga parag-uma an nagpakamatay pinaagi hin paghikog ha Brgy Tigbao, Carigara, Leyte hadin nakalabay nga adlaw.
An biktima in ginkilala nga hi Rowino Agunos, 35 anyos, waray asawa, parag-uma ngan nag-uukoy ha Brgy Candigahub han nasabi nga bungto.
Ha inisyal nga imbestigasyon han Carigara PNP Station, hi Agunos in nakig-irignom anay han iya mga kapaturan didto mismo ha panimalay han biktima. Ini nga ira pagkaharampang in umabot ha tabis nga oras han kagab-ihon, sanglit ginsaway hira han kag-anak han biktima kay nakaka-aringasa na hira.
Tungod hini, nagdesisyon an magparaptod nga manguli ha ira tagsatagsa nga panimalay. Hadto nga gab-i, gumawas gihapon ha balay hi Agunos ngan waray na bumalik.
Kinabuwasan, an patod han biktima an nakadiskubre kan Agunos nga nabitay an lawas pinaagi hin paghigot hin electric wire didto han ira payag ha uma. Binawi-an han kinabuhi hi Agunos tungod han paghikog.
Padayon an imbestigasyon han mga otoridad, ngan usa han mga anggulo nga posible rason han pag-suicide amo an problema ni Agunos ha ira pamilya. #
