Isumat.com/8:05AM, Abril 23, 2021

Iginpa-abot han DepEd-Catbalogan City Division an ira pagrekognisar ngan pagsaludo ngadto han batan-on nga banggi-itan ha Matematika ngan Seyensya nga naghakot hin kadam-an nga mga international awards han nag-agi nga tuig.

Hadin Mierkules, Abril 21, an 12-anyos nga hi Mark Christian Mendoza in ginpasidunggan han DepEd-Catbalogan ha panguna ni Division Supt. Marilyn Siao ug iba pa nga opisyales han ahensya.

Kun manunumduman, sapin-sapin nga onor an na-angkon ni Mendoza ha mga international competitions han tuig 2020 ngan ginlalakipan han masunod: Gold- 2020 Hongkong International Math Olympiad; Gold- 2020 Thailand International Math Olympiad; Student Excellence Award – DepEd Central Office; ngan Youth Excellence in Science – 2020 Department of Science and Technology.

Hi Mendoza in nakadaog gihapon hin Silver Awards dida han 2020 Guandong Hongkong Macao Greater Bay Math Olympiad, 2020 Int’l Math Olympiad for Young Achievers, 2020 Intl Mathematics Wizards Challenge ngan 2020 Intl Competitions and Assesment for Schools in Math.

Mayda liwat niya Bronze Awards dida han 2020 Australian Math Competition, 2020 Hongkong Intl Science Olympiad, ngan 2020 Intl Competitions and Assesment for Schools in English.

Hi Mendoza in Grade 6 nga estudyante ha Samar College ha Catbalogan City, Samar.

An LGU-Catbalogan in naha-una na nga naghatag gihapon hin pasidungog ngadto kan Mendoza. #