Isumat.com/Marso 12, 2022
“Dako an akon mabubulig ha mga kabataan kun magin usa ako nga teacher”, ini an iginpahayag ni Jhane Eyre Marie Olmedo, an naka-angkon han ikatulo nga pwesto ha Secondary Level han gindumara nga Licensure Examinations for Teachers (LET) hadin Enero 2022.
Hi Olmedo, nga tinatawag ha agnay nga Jani, in nakakuha hin 92.40 nga grado dida han eksaminasyon kun diin sobra 20 Mil nga examinees an malinangpuson nga nakapasar.
Dida han panmaki-ana han Isumat.com, iginsumat ni Jani nga an iya hadto karuyag nga kurso ha kolehiyo amo an Biology, pero ginsagdunan hiya ni iya tatay nga darudamo an iya mabubuligan, labi na an kabataan kun pagtutdo ha eskwelahan an magigin propesyon. Sumala kan Jani, iya pinamati-an sagdon ngan samtang nag-eeskwela hiya ha Leyte Normal University, nasantop niya nga higugmaon niya an pagtutdo, sanglit naniguro gud hiya ha pag-aram.
Iginbuyagyag gihapon ni Jani nga waray ha iya hunahuna nga makaka-api hiya han Top 10. Nagseguro la ako pag-eskwela ngan pag-aram, upod an tim-os nga pag-ampo ngan hingpit nga pag-review, sumala pa kan Olmedo.
An komunidad han LNU ha panguna ni University President Evelyn Aguirre ug an mga instructors in pirmi naghihinulat han resulta han eksaminasyon sering pa ni Jani. Ini in tungod seguro han ira paglaum nga mahi-upod hiya han Top 10, pero sumala ha iya ighahatag man ito han Ginoo kun para gud ha iya…ngan ini in natuman.
Hi Olmedo in nakagtapos ha LNU han kurso nga BSED Biological Education hadton 2019.
Usa gihapon han naghatag hin inspirasyon para kan Olmedo amo an iya boyfriend nga hi Jonel Gallaza. Hi Jonel an naghatag hin motibasyon nga maniguro hiya. Tungod hini, hira Jani ngan Jonel in aada ha kasaysayan nga mag-oyab nga nanguna han LET. Hadton Setyembre 2021 nga LET, hi Jonel an nagin #8 dida han mga nagpakapasar.
Komo magurang han tulo nga magburugto, ginlalauman ni Jani nga makakaghatag liwat hiya hin inspirasyon ngan magigin maupay nga susbaranan han iya kamanghuran.
Hul-os an pasalamat ni Jani han iya kag-anak, hira Nimrod Celsius, nga nagtatrabaho ha gobyerno ngan an iya misis nga aadi ha pribado nga sektor han waray pagkapapas nga suporta ha iya.
Bisan kun nakab-ot ni Jani ini nga dako nga onor ha LET exams, deri hiya mahunong pagpa-hilarom han iya kina-adman ha edukasyon. Iya igin-asoy nga maniningkamot pakatapos han Master’s Degree basi madugangan pa an iya kapasidad komo magturutdo.
Ginhihingyap ni Olmedo nga makagtutdo ha high school o ha kolehiyo kataliwan mahuman an iya Masters Degree.
An kabataan an paglaum ngan kabubwason han nasud, sumala han pahayag han nasudnon nga bayani Jose Rizal, ngan dako an ma-aamot ni Jani han paghurma han kina-adman han kabataan kay amo ini an iya bokasyon ha kinabuhi. #
