Isumat.com/Marso 14, 2022
Aada na ha mga kamot han prosekusyon an pagdesisyon kun igsasalawad ha korte an kaso nga Robbery with Intimidation (Extortion) kontra han tulo nga pulis han Palo Municipal PNP Office.
Ini an iginpahayag ni PMaj Glenn Aculana, Deputy Chief han CIDG-Regional Fielf Office 8 ha pakighimangraw han iFM-RMN Tacloban.
Nagsering hi Aculana nga nagdesisyon an korte nga makagpiyansa an mga akusado sanglit temporaryo hira nga nakagawas ha karsel, pero ha bisan ano nga oras puede hira igpatawag han huwes kun ginkikinahanglan. An nasabi nga kaso in bailable, o puede magpiyansa an mga suspetsado.
An Tacloban City Prosecutors Office in nagrekomendar hin 100 Mil pesos nga piyansa han kada usa han tulo nga suspetsado.
Hapagkayana, an prosekusyon an magtitirutimbang han mga ebidensya nga igpepresentar han magkaluyo nga panig antis magdesider kun igsasalwad ha korte an nasabi nga kaso, pahayag pa han CIDG official.
Kun manunumduman, hira Sgt Alex Asis, Sgt Raffy Reposar ngan Cpl Jerwin Dacillo in na-aresto dida han entrapment operation hadin Marso 10, 2022 didto mismo han estasyon han PNP ha Palo. Ini in tungod han reklamo ni Cherrie Pulga nga ginkikikilan hiya pinaagi hin pagtarhog han tulo nga kapulisan.
Iginsumat ni Aculana nga subay han panginano han imbestigador, nagawas nga 36 Mil pesos an gin-e-extort han mga suspetsado tikang kan Pulga. Ini nga kantidad in gagamiton daw para han piyansa ni Pulga kay mayda na iginpagawas nga warrant of arrest an korte kontra han babaye.
Hi Pulga in naatubang gihapon hin kaso nga extortion tungod han alegasyon nga nangikil hiya hin mga PNP applicants basi maseguro nga matatagan hin slots pagsulod ha pulisya. Na-aresto hi Pulga hadton Uktubre 2021 ug an tulo nga kapulisan in kaapi han mga nakadakop kan Pulga.
Hi Pulga in nagpaki-ana ha korte kun tinood gud man nga mayda arrest warrant kontra ha iya ngan iya nasabtan nga deri ini tinood ngan ginhahadlok la hiya han tulo nga PNP members.
Tungod hini, sumala kan Aculana, nag-aro hin bulig hi Pulga ha Integrity Monitoring and Enforcement Group han PNP dara han pangikil ngan pagtarhog ha iya. An IMEG ug an CIDG upod an PNP Leyte Provincial Office an nagdumara han entrapment operation kun diin nadakop ha akto nga nakarawat han marked money an mga kapulisan.
Igindugang pa ni Aculana nga ginkakaptan na yana han mga imbestigador an kwarta nga gingamit han transaksyon ug an mga cellphones han kapulisan kun diin importante ini nga mga ebidensya kay hi Pulga in nagsumat nga pinaagi ha text messages an pangikil ha iya.
Positibo gihapon nga ginkilala ni Pulga hira Asis, Reposar ngan Dacillo nga amo an nangingikil ha iya, sering pa ni Aculana.
An tulo nga kapulisan in temporaryo nga igindetiner ha CIDG tobtob han ira pakagpiyansa. #
