Isumat.com/Marso 11, 2022
“Extortionist kontra igkasi mga extortionist!”
Amo ini yana an nalutaw nga eksena katapos la nga ma-aresto in tulo nga kapulisan nga nakadestino ha Palo, Leyte Municipal Police Office tungod hin reklamo nga extortion o pangikil, ug an tagreklamo in naatubang gihapon hin kaso nga extortion.
Dida han spot report nga iginpadangat ha Criminal Investigation and Detection Group (CIDG) Regional Field Office-8, ginkilala an mga suspetsado nga nadakop ha entrapment operation nga hira Sgt Alex Asis, 55 anyos, ngan residente ha Brgy Cabarasan Guti, Palo; Sgt Raffy Reposar, 34 anyos, taga Brgy San Miguel, Palo; ug hi Cpl Jerwin Dacillo, 36 anyos, residente han Brgy Castilla, Palo. Hira in naka-aasign ha police office han nasabi nga bungto.
An tagreklamo in ginkilala nga hi Cherrie Quinones Pulga nga taga Palo gihapon. Hi Pulga in nagreklamo nga ginkikikilan hiya hin kwarta han tulo nga kapulisan ug natabo ini nga extortion ha iya hin haros upat na ka bulan. Dara hini, naghimo hin operasyon an mga personales han CIDG, PNP Regional Office, PNP Integrity Management Group ngan Palo PNP.
Gindumara an entrapment operations kakulop, Marso 10, 2022, pasado alas 5 han kulop didto mismo han estasyon han pulis ha Palo.
Nakuha tikang han tulo nga suspetsado an unom ka bug-os nga tag Mil Pesos (6000) nga marked money, upat nga cellphones, ngan an mga service firearms nira Reposar ngan Dacillo.
Gindara an mga suspetsado ug an mga ebedensya ha CIDG para han kaangayan nga disposisyon nga dokumentasyon. Gin-aandam na yana an mga kaso kriminal (Robbery with Intimidation-Extortion) ngan administratibo kontra han tulo nga kapulisan.
Nakakuha gihapon hin impormasyon an Isumat.com nga labot la han multiple extortion, hi Pulga in nagreklamo gihapon hin robbery ngan sexual harassment kontra han mga gintatahapan.
Kun manunumduman, hi Pulga in na-aresto hadin Uktubre 2021 tungod hin alegasyon nga nangikil hiya hin mga aplikante pagka-pulis. Dida han reklamo, naabot hin 20 Mil pesos an gin-aaro niya ha mga PNP applicants kabalyo han pagsaad nga makakasulod ha serbisyo.
Hi Pulga in nakagawas ha karsel tungod kay nakagpiyansa han iya kaso. #
