Isumat.com/8:18AM, June 2, 2020
Haros an bug-os nga Rehiyon Otso an iginpla-ilarum na ha Modified General Community Quarantine (MGCQ) tinikangan Hunyo 1, pero an syudad han Ormoc in nagpadayon pag-implementar han General Community Quarantine (GCQ).
Dida han iya pahayag kakulop, hi Mayor Richard Gomez in nag deklarar nga GCQ la gihapon an igpapasunod ha iya lugar nga nasasakupan, pero mayda la paghukal han istrikto nga mga aludayday nga iginpasunod han nag-agi nga mga semana.
Nagsering hi Gomez nga gintutugutan na an kadam-an nga negosyo nga bumalik ha operasyon basi makatukdaw utro an ekonomiya han syudad, sugad man an katawhan, labot la han magsinakitnon, an puede makagawas ha balay. Pero igindig-on han alkalde nga ngatanan han magawas han balay in mayda quarantine pass ngan magsusul-ot hin face mask sugad man an pag-obserbar han physical distancing.
Ginpahinumdom gihapon han alkalde nga an peligro han covid-19 in deri pa tapos, an importante la nga mas magin ikmat pa an mga mulopyo ngan maghirot gud kontra han kagaw. Iya gihapon gin-aghat an publiko nga kun may mga tawo nga magka-abot tikang ha iba nga lugar, kinahanglan igpasabot ini dayon ha barangay officials basi mabantayan ini nga mga tawo.
Hapagkayana, naabot hin 227 an mga Ormocanon nga nakabalik tikang ha iba nga lugar. Nagpapa-ilarum ini hira ngatanan han duha ka semana nga quarentina. 166 an aadto ha Covid Ligtas Center ug 61 an aadto hin usa nga hotel.
Nagpapabilin nga COVID-free an syudad tobtob yana nga mga panahon. # (KEVIN SIOSANA)
