Isumat.com/2:54PM, June 1, 2020

Nagapabati hin pagkabaraka an publiko tungod han nabisto han mga otoridad han Tacloban City Government nga usa nga Balik-Taclobanon in nakig-tagaytagay han iya mga paryente ngan kasangkayan kakulop, Mayo 31, han iya pag-abot tikang ha Iloilo.

Sumala han mga katawhan, deri gud angay igpatuman an Home Quatrantine kay deri segurado nga magsusunod hini an mga Returning Residents sugad man an mga ka-urusa niya ha balay ngan mga kasangkayan.

Ira iginsuhestyon ha City Government nga kinahanglan didto gud ha Quarantine Facilities han syudad temporaryo pa-ukyon an mga nagkakabalik nga residente tikang ha iba nga lugar ngan kun mahihimo, igpailarum hin laboratory test an swab samples basi masegurado nga negatibo han corona virus ugsa pa-uli-on ha ira tagsatagsa nga panimalay.

Kanina han aga, ginkuha han mga personales tikang ha City Hall an 38-anyos nga lalaki tikang ha iya panimalay ha New Hope Village, Brgy Sta Elena ngan iginbalhin ha Abucay Quarantine Facility basi didto tapuson an duha ka semana nga kwarentina.

Hinsabutan nga kakulop, dida mismo han iya pag-abot nakig-irignom hiya ha pira niya nga kasangkayan ngan paryente, ug ini in klaro nga pakasupak han “No Visitors Policy” para han Home Quarantine. Nagrason pa ini nga lalaki nga ira daw gintuman an health protocols samtang nagtataragay an iya grupo. Pero bisan kun aminado hiya han iya kasaypanan, iginbalhin na hiya ha Quarantine Facility.

Ha ilarum han Bayanihan Heal as One Act nga balaud, an mga makakatalapas hini in mumultahan hin 20 tobtob 50 Mil pesos o puede mapreso hin usa tobtob unom ka bulan. Waray liwat mahisumat kun kakasuhan ini nga Balik-Taclobanon.

Ini nga lalaki in usa nga driver hin pribado nga kompaniya ngan na-abtan han lockdown ha Iloilo.

Denhi ha syudad han Tacloban, an mga nagkakabalik nga residente in gintutugutan nga mag kwarentina la ha ira balay basta may espasyo ngan makakaksunod han mga aludayday; samtang an deri makakasunod hini in dadad-on ha Quarantine Facilities. # (KEVIN SIOSANA)