Isumat.com/ Disyembre 22, 2022
Mahugot an warning o pahimatngon han gobyerno nga maatubang hin kaso an mga pulitiko, negosyante, kontraktor, grupo o mga indibiduwal nga naghahatag hin bisan ano nga klase hin suporta ha New Peoples Army.
Hi Regional Director Eustacio Bacabac han National Intelligence Coordinating Agency (NICA) in nagbuyagyag nga an ira ahensya in may ginkakaptan nga listahan hin mga personalidad denhi ha Rehiyon Otso nga nahatag hin ayuda ha rebelde nga mga kumunista. Ini in ginlalakipan hin mga pulitiko, negosyante ngan mga kontraktor.
Durante han Media Forum ha Hotel de Fides, Tacloban City, kakulop Disyembre 21, 2022, iginsumat ni Bacabac nga gin-iistudyuhan yana han Security Cluster han gobyerno an ira sunod nga pitad labi na gud an pagtirok hin bastante ngan mabug-at nga mga ebidensya kontra hini nga mga indibiduwal.
Sering pa han opisyal, kinahanglan magin makusog an ira ebidensya basi mapamatud-an ngan magbaton ha balaud ini nga mga personalidad. Pakasupak ha mga probisyones han Anti-Terrorism Act an pagsuporta ha mga terorista, sanglit angay la masirutan an magbubuhat ini, sering pa ni Bacabac.
Pira na nga indibiduwal an ira gin-warningan nga deri mahidabi hin sugad hini nga aktibidad kay talapas ini ha balaud. Matuod, ginklaro niya nga nagtikaguti na ini nga mga personalidad denhi ha eastern Visayas nga nahatag hin ayuda ha NPA.
Iginpatapod pa ni Bacabac nga kadagmitan nira igpapasabot ha media ngan ha publiko kun may mga indibidiwal nga nasampaan hin kaso tungod han pagsuporta han kagi-usan kumunismo. #
