Isumat.com/ Disyembre 23, 2022
Hi Mayor Remedio Veloso han San Isidro, Leyte in nakakakarawat na hin panhulga ha iya kinabuhi antis pa mamatay dida hin ambush hadton Disyembre 21, 2022 an iya magurang nga bugto nga babaye.
Ha report han Inquirer.net, iginsumat ni San Isidro Councilor Carmichael Villarino nga mayda na tarhog hin pagpatay kontra han alkalde amo nga mayda igin-assign nga security escorts ha iya an Leyte Provincial PNP Office.
Hadton kulop han Disyembre 21, an bugto han mayor nga hi Juanita Veloso, 77 anyos in naawat an kinabuhi han paarakan hin bala an iya sinasakyan nga sports utility vehicle ha national highway, Brgy Libongao, Kananga, Leyte.
An mga kaupod han biktima ha sarakyan nga hira Leleena Veloso (misis han Mayor), ug an drayber nga hi Edmil Bacay in nakatalwas ngan waray maigo hin bala dida han insidente.
Nagsering hi Villarino nga ha iya pag-ino-ino, mayda kalabutan an pulitika han krimen.
Sugad-sugad nga amo liwat ini an usa han mga anggulo nga gintutumbok han mga imbestigador han Kananga Police Station. Hi Corporal Nicanor Romawak han Kananga Station in nagpahayag nga posible pulitika an rason hini nga panggama.
Hinsabutan nga an behikulo nga sinasakyan han biktima in gintatag-iyahan han alkalde.
Hi Villarino in nagpabati nga an bungto han San Isidro in nabibido tungod hini nga panhitabo ngan ginhihingyap han pamilya han biktima an kadagmitan nga kasolbar han kaso.
An mga suspetsado han krimen in umeskapo sakay hin Nissan Navarra color Alpine white pick-up nga may plate number ABN 7103.
An biktima in anay Municipal Administrator han San Isidro. Ha impormasyon han Inquirer.net, duha pala ka semana an biktima denhi ha Leyte tikang han iya pag-abot tikang ha Amerika basi magbakasyon. #
