Isumat.com/ Disyembre 23, 2022
Duha nga miembro han Philippine Army ngan usa nga sibilyan an nagkadadakop han mga otoridad katapos nira manikas hin usa nga gasolinahan ha Balangiga, E. Samar hadin Disyembre 20, 2022.
Ha impormasyon nga nahikay han IsumatNews, ginkilala an mga suspetsado nga hira Ian Jolero, 30 anyos; ngan Guiller Cuanico, 35 anyos nga nakadestino ha 63rd Infantry Battalion ha Quinapondan, E. Samar. Ginkilala naman an sibilyan nga gintatahapan nga hi Jason Agner, 35 anyos, taga Balud, Basey, Samar.
Pasado alas 8 han gab-i hadto nga petsa, an gasolinahan ha Brgy Cansumangkay, Balangiga in gin-hold-up hin tulo nga armado nga suspetsado. Nadara han mga suspetsado in 1,200 pesos, duha nga cellphones ngan sling bag han gasoline boy.
An kahera han gasolinahan in na-alerto sanglit iya pa nahipos an iba nga kwarta ha ilarum han iya bado, sanglit waray tanan makuha han mga hold-uppers an salapi.
An mga kapulisan han bungto upod han 2nd Provincial Mobile Force Company in kadagmitan naghimo hin paagi nga madakop an mga gintatahapan. Alas 3 han maagahon kinabuwasan, nasikmit an mga suspetsado ha Brgy Sta Rosa han nasabi nga bungto.
Hinsabutan pa nga nagliwan hin tshirt an mga suspect ug an ira bonnet nga iginsul-ot han pan hold-up in ginbalyu-an liwat hin kalo. Pero positibo nga ginkilala hira han mga personales han gasolinahan tungod han ira mga mata ngan boses.
Nakumpiskar tikang ha ira in tulo nga kalibre .45 kun diin an usa hini in government-issued firearm. Usa pa nga silencer hin pusil an nakuha tikang han grupo.
An mga suspetsado in ginsampaan na hin kaso nga robbery ha Regional Trial Court ha Balangiga ngan aada ha kustudiya han kapulisan han mao nga bungto.
Gin-iimbestigar gihapon kun an mga suspetsado in nagpapaluyo hin mga pan hold-up ha magkalainlain nga parte han Samar. # (via Rommel Rutor & GMA News)
