TACLOBAN CITY — Nagbuhat hin Noise barrage an mga inmates ha Burauen District Jail banda alas 8 han aga kakulop, Dominggo ha lugar han Baranggay Cagangon, Burauen, Leyte.

Kurahab han mga inmates ha mao nga presohan in amu an “Demand masunod”

Sumala ha mga inmates nga nagbuhat hira hin noise barrage tungod diri na daw sakto an pagpapakaon ha ira sugad man  problema an kawaray hin rasyon hin tubig.

Ha pakikipaghimangraw han Bombo Radyo Tacloban kan JO2 Victor Arias Jr, Public Community Service ha Burauen Jail, ginpanhimuwa hini an mga alegasyon nga ginbabatak han mga inmates.

Ginpahayag hini nga waray magkulang an ira buhatan ha paghahatag hin pagkaon ngan tubig ha mga preso.

Dugang pa hini nga tikang dida han lumingkod hi SJO3 Primo Paloma kumo bago nga Jail Warden in nagin istrikto na ini ha pagpapatuman han Non-Smoking ha sakob han presohan.

Labot la ha pagbabawal han pagsisigarilyo, usa pa nga nakikita nga reklamo han mga preso amu an diri anay pagtugot ha Conjugal visit labi pa nga padayon nga ginrerehabilitate an kwarto para ha mga mag asawa nga nabisita.

Duda ni Arias nga usa ha mga rason kun kay anu nagbuhat hin pag gios an mga preso in tungod ha impluwensiya han mga anay inmates ngan High Risk Drugs prisoner han Tacloban City Jail ha pangunguna ni Alyas “Romeo Manicani nga responsable daw ha ginbuhat gihap nga Noise Barrage ha Tacloban City Jail dida han nakalabay nga Pebrero.

Basar ha record, nga maabot ha 63 an kabug-osan nga mga preso ha Burauen District Jail. (Bombo Radyo Tacloban)