Isumat.com/9:12PM, May 25, 2020
Tungod han alegasyon nga nanginlabot hiya han panhatag han Social Amelioration Program (SAP) cash assistance, ginsampaan hin kaso hi Mayor Thelma Nicart han San Policarpo, Eastern Samar.
Sumala han report han Criminal Investigation and detection Group (CIDG) Region-8, hi Rudy Picardal, barangay captain han Tanauan ha San Policarpo in nagreklamo nga waray nahi-agom han SAP nga ayuda an mga residente han iya barangay. Nagsering hi Picardal nga nanginlabot hi Nicart nga deri tagan an iya barangay kay waray hira magsuporta han alkalde dida han nag-agi nga eleksyon.
Naghimo daw hin paagi hi Nicart nga ighatag ha iba nga barangay an hinabang imbes nga para unta adto han mga benefeciario nga nag-uukoy han nasasakupan ni Picardal nga barangay.
An CIDG in nagsalawad kontra kan Nicart hin kaso nga pagtalapas han Republica Acta 11469 o tinatawag nga Bayanihan to Heal as One Act ha Provincial Prosecutor’s Office han Sinirangan Samar.
Kun aton manunumduman, makarawat unta hin tag singko mil nga ayuda an kwalipikado nga mga pamilya ha ilarum hini nga programa komo tambulig han kablas nga mga pamilya nga grabe an epekto han corona virus pandemic.
An bungto han San Policarpo in nag-aantos gihapon yana han duro nga distroso ni bagyo Ambo kun diin 70 porsyento han kabablayan an nagkaruruba ngan duha ka tawo an namatay. Dida hini nga munisipalidad syahan nga igin-umpag an pwersa han nasabi nga bagyo sobra na usa ka semana an nakalabay. # (KEVIN SIOSANA)
