Isumat.com/8:43AM, Pebrero 22, 2021
Nasalbar tikang ha peligro in magtala-amay han pusilon ngan tigbason hira hin usa nga lalaki ha Dagami, Leyte hadin nag-agi nga adlaw.
Ginkilala an mga biktima nga hira Gerry Panao, 44 anyos, usa nga barangay tanod ug an 19-anyos nga iya anak, Reymart Panao. Hira in mga residente ha Brgy Plaridel han nasabi nga bungto. An suspetsado in ginkilala nga hi Diorico Panao, 36-anyos. Waray mahisumat dida han report kun ano an relasyon han mga biktima ngan suspetsado.
Dida han imbestigasyon, an magtala-amay in nakadto la ha sulod han ira balay han tigda umabot hi Diorico. Iya dayon pinusil hi Reymart nga naigo ha wala nga tiil. Nakahimo pag-ato han suspetsado an amay nga hi Gerry, pero natigbas an iya kamot han suspetsado.
Kadagmitan kumalagiw hi Diorico, samtang gindara ha hospital an mga biktima basi pagtambalon.
Subay han inisyal nga imbestigasyon, posible nga personal nga dilito an motibo han krimen. Samtang ginsusurat ini nga notisya, nagpapadayon an mga otoridad paghalpat han suspetsado. #
