Isumat.com/7:49AM, Pebrero 20, 2021

Usa nga pulis an nag-antos hin kasamdan dida han natabo nga engkwentro kontra han mga rebelde nga kumunista, Pebrero 19, ha Las Navas, Northern Samar.

Dida han report nga nahikay han Isumat.com, an nasamad in ginkilala nga hi Patrolman Villamor Dumaguing. Hiya in kaapi han grupo nga ginpapangunahan ni PLt Mark Torrecampo.

Samtang naghihimo hin combat operation an mga otoridad, ira iginkasurapo an mga rebelde nga terorista harani ha Brgy Cuenco, Las Navas. Natabo ini pasado alas 12 han udto, Pebrero 19, 2021.

Iginsumat han mga kapulisan nga pira nga mga rebelde an nagkasasamaran dida han pinusilay pero nakahimo hira hin pag-eskapo. An mga tinubyanan han balaud in naghihimo yana hin hot pursuit operation.

Samtang, usa naman nga rebelde an bumalik ha panig han gobyerno. Ginkilala hiya nga Ka Doy, 42 anyos, residente han Villareal, Samar.

Hi Ka Doy in anay miembro han Sub-Regional Committee Sesame han kumunista nga kagi-usan. Nagtubyan hiya han iya kalugaringon ngadto ha 805th Maneuver Company han Regional Mobile Force Group.

An nagsurender in makakatagamtam han mga beneficio ngan ayuda financial para han iya pagbalik ha normal nga panginabuhi. #