Isumat.com/10:55AM, Pebrero 22, 2021
Dako hin duro an mabubulig ha panginahanglan ha panlawas ngan emergency nga mga sitwasyon ha mga residente han Maripipi, Biliran kun matapos na an gintutukod nga New Maripipi Community Hospital.
Dida han report han Biliran Provincial Health Office, ginlalauman nga matatapos an konstraksyon han hospital ha bulan hiton Hunyo yana nga tuig. Panguna nga mababaton han facilidad an paghimo hin inisyal nga pagtimangno han emergency cases antis ig-refer ha iba nga hospital.
An Maripipi in usa nga municipalidad nga namumutang ha isla sanglit dako gud nga problema kun mayda mga pasyente nga kinahanglan hin kadagmitan nga pagtimangno kay deri maaakos han Rural Health Unit kun grabe nga mga kaso. Kinahanglan magbiyahe pa ha kadagatan basi la madara an pasyente ha Biliran District Hospital ha Naval o mga hospital ha Ormoc ngan Tacloban.
Hadton dekada-70 nagkaada na hin Community Hospital an bungto pero waray igpadayon an operasyon hini, ug an RHU nala an nagbabaton han panlawas nga mga isyu han bungtuhanon. Dida han 2019, hi Mayor Joseph Caingcoy an nakadaog ha syahan nga termino komo alkalde han Maripipi ngan waray hiya maglangan-langan pagmugna han proyekto nga magkaada hin bag-o nga hospital ha iya nasasakupan.
Sering pa ni Caingcoy, maiha na nga nasusubo hiya tungod han kawaray derekta nga facilidad para han panlawas han iya mga kababayan. Yana nga deri na maiha matatapos na ini, deri na magsasakripisyo ngan igbubutang ha peligro an kinabuhi ha mabalod nga kadagatan basi la igbiyahe an mga pasyente, dugang pa han alkalde.
Kadungan hini, ginpasalamatan ni Caingcoy hira Congressman Gerry Espina Jr ngan Governor Roger Espina han ira pag-giya ngan ayuda financial para han proyekto. Ginpadangat gihapon han alkalde an iya utang nga kaburut-on ha mga opisyales han LGU-Maripipi ngan iba nga sektor nga naghatag hin suporta hini nga panuyo.
Nahoman na an Phase 1 tobtob Phase 3 han proyekto nga naglalakip han pag guba han daan nga straktura, pagbutang hin pundasyon, pag-instolar han flooring, ug an pag-atop. Nagkantidad ini hin 8 Milyones pesos.
An gintatrabaho yana amo an electrial system, air-conditioning unit, ngan pagtaod han mga porta ngan bintana nga kaparte han Phase 4 nga nabalor hin 4 Milyones pesos. Katapos hini, amo na an pagpader, water supply, pagpintura ngan landscaping.
Kun tikadto ha Maripipi, masakay pa hin pumpboat tikang ha bungto han Kawayan ug mabiyahe hin sobra 30 minutos. Kun tikang ha Naval an pagtabok, sobra 2-oras an byahe ngadto ha Maripipi. Mayda mga panahon nga duro ka dagko an balud ngan makusog an hangin ngan sulog hit kalalawdan sanglit aada pirmi an peligro ha pagbiyahe tikadto ngan tikang ha Maripipi.
Ha luyo nga bahin, magtitikang yana nga tuig an pagtukod han darudako, kumpleto, mas moderno nga Biliran District Hospital ha Naval, Biliran. #
( with photo and reports from Maripipi Island Blogs and PHO-Biliran)
