Isumat.com/Mayo 29, 2023

Katapos hin usa ka bulan tikang han kompetisyon han Eastern Visayas Regional Athletic Association (EVRAA) 2023, nagbalyo han ira pwesto dida han final standings an Tacloban City ngan Maasin City.

Han Closing Ceremony han EVRAA, iginproklamar an Tacloban City nga naka-angkon han ikatulo nga pwesto, samtang ika-upat an Maasin City. Nagtabla ha parehas 19 golds an duha nga syudad, pero naka-igbaw an Tacloban kay darudamo an silver ngan bronze medals.

An Maasin City in nagsalawad hin protesta ha DepEd Regional Office ngan napamatud-an nga nagsayop an technical personnel han EVRAA kay waray mahilakip pag-ihap an usa pa nga gold medal han Maasin. Dida han pagberipikar, lumutaw nga 20 gold medals an Maasin, sanglit ira nalabwan an 19 golds han Tacloban.

Han una nga semana, nagkamay-ada hin special awarding durante han Management Committee Meeting han DepED Eastern Visayas kun diin pormal nga igindeklarar nga 3rd placer an mga Maasinhon ngan natagak ha 4th place an mga Taclobanon.

Sumala han Information Division han DepED-Region, ini nga resulta in mahuyayag naman nga gin-akseptar han Tacloban City Division.

Dida han Sabado nga adlaw, hi Maasin City Vice Mayor Maloney Samaco in nag-post ha facebook nga nagin malinangpuson an protesta han Team Maasin han resulta han EVRAA 2023.

An Ormoc City an malinangpuson nga nakagdepensa han ira titulo komo kampeon ngan ikaduha nga pwesto an Leyte Division. #