Isumat.com/7:21AM, Pebrero 25, 2021
Nanawagan an Department of Agriculture Regional Office ha mga Local Government Units nga magdumara hin imbentaryo ngan igrehistro an ngatanan nga baboy ug an mga tag-iya hini ha ira nasasakupan nga lugar.
Hi Francis Rosaroso, tagpamulong han DA-Region 8, an nagbuyagyag ha iFM-RMN Tacloban, nga damo an waray permiso nga magnegosyo o magkaada hin piggery ha magkalainlain nga parte han rehiyon. Ini nga mga piggery in waray business permit, deri nagbabayad hin buhis, ngan waray kaangayan nga mga papeles.
Sumala pa kan Rosaroso, nadiskubre han ira ahensya nga mayda “Ma-impluwensya” nga mga indibiduwal an nagtatag-iya han mga piggery nga waray business permit, pero nagpapadayon an operasyon han ira negosyo.
Matuod, waray na maghatag pa hin kadugangan nga detalye an opisyal kasumpay hini nga mga personalidad ngan kun hain nga mga lugar.
Nagsering hi Rosaroso nga supak ini ha balaud kay tanan nga nagnenegosyo hin babuyan in angay naka-rehistro ngan mayda business permit basi mahilakip ha monitoring han mga otoridad labi na gud kun mayda mga sakit han baboy sugad han African Swine Fever (ASF).
Gin-awhag ni Rosaroso an mga LGUs nga igparehistro an tanan nga baboy, ha negosyo man ini o pribado nga pag-gamit basi mahi-upod ini ha pagbantay han ahensya. Namumutang ha peligro an industriya han pagbabuyan kun damo an deri naka-rehistro kay posible magbaligya an mga piggery owners hin may sakit nga kababuyan kay deri man hira nababantayan.
Igindugang pa han DA nga mas maupay kun naka-rehistro basi masayon liwat an paghatag hin kina-adman ngan ayuda pananglitan mayda mga isyu kasumpay han pagbabuyan. #
