Isumat.com/7:54AM, Pebrero 25, 2021
Padayon an pakigbisog ni alyas Shane basi maka-angkon hin hustisya kasumpay han paglugos ha iya han kumander han New Peoples Army nga iya anay gintapuran nga magtitimangno ha iya.
Ha deri pala maiha, hi Shane nga na-recruit hadto han kamunista nga kagi-usan, in nagkaada hin kadugangan nga paglaum tungod kay an korte in nagpagawas han Mandamiento de Arresto kontra kan Paterno Opo, aias Yoyo/Dodong/Taki.
Hi Opo amo an kumander han terorista nga grupo nga naka-recruit han menor-de-edad nga hi Shane, ug samtang nakadto ha kampo han NPA an daragita, pira ka beses nga gintamas-tamasan an iya pagkababaye han akusado. Hi Shane ug duha pa nga kaupdanan in nakahimo pag-eskapo tikang han mga rebelde han una nga tuig ngan ginbuligan hira han gobyerno.
An RTC-Branch 11 ha Calubian, Leyte an nagpalusad han kamanduan nga dakpon hi Opo nga nakapatik an address ha Brgy San Juan, Mahaplag, Leytel. An korte in waray magrekomendar hin piyansa para han akusado.
Kasumpay hini, an Philippine Army in nananawagan ha publiko nga makigsumpayan ha mga otoridad kun mayda nira impormasyon mahitungod kan Opo basi ma-aresto dayon ngan atubangon an kaso nga rape.
Antis pa hini, hi Shane in nagsurat hin panginyupo ha grupo nga Gabriela nga buligan hiya makab-utan an hustisya, pero sugad-sugad nga napakyas an iya panuyo kay waray man kabatunan tikang han nasabi nga hugpo, sumala han militar. #
