Isumat.com/6:05AM, Pebrero 25, 2021

An sentro han panggobyernuhan ngan negosyo ha Siniran Bisayas in apektado na han African Swine Fever (ASF).

Iginpasabot han Department of Agriculture nga nakasulod na ha Tacloban City an ASF, an kagaw nga nakakasakit ngan nakakamatay han kababuyan. Hi DA Regional Director Angel Enriquez in nagbuyagyag kakulop, Pebrero 24, kumpirmado nga mayda baboy ha Brgy 84, San Jose an nagpositibo han kagaw.

Tungod hini, panmamatayon an ngatanan nga baboy nga nasasakop han 500-metros nga distansya tikang han natapnan han baboy, subay han patakaran han ahensya. Ini in agud deri na magsarang an virus.

Kasumpay hini, hira Enriquez ngan Tacloban City Mayor Alfred Romualdez in nagkahimangraw na kun diin ira ginhingadayan an mga proseso han pagkontrol han kagaw sugad man an mga paagi ha paghatag hin ayuda financial ha mga apektado nga tag-iya hin baboy.

Gin-aghat gihapon ni Enriquez an City Government nga pahuruhugton pa an border control animal checkpoints, imbestigasyon ngan surveillance.

Antis hini, naha-una nga gin-atake han ASF an mga bungto ha probinsya han Leyte nga amo an Abuyog, Javier, La Paz, MacArthur, Dulag, Tanauan, Palo, Pastrana, ngan Burauen.

An ASF in deri nakakatapon ha tawo. Baboy la an natatapnan han virus ngan masayon la ini makatapon ha iba nga kababuyan ngan nag-iiha kamatay an kagaw. Ini an nagin rason han pagkulang hin suplay didto ha Luzon ngan paghitaas han presyo han baboy ngan iba pa nga pork products. #