Tungod han grabe nga kabidu-an kay mayda na iba nga iginkakalungon an iya live-in partner, gintiwasan hin usa nga lalaki an iya kinabuhi.

Ini an anggulo nga ginkikita han mga imbestigador kasumpay han pagpakamatay han biktima nga hi Rayan Dadizon, 32 anyos, karpentero, residente han Lions Village, Cabalawan, Tacloban City.

An paryente ni Dadizon an nakadiskubre han nabitay nga patay nga lawas han biktima alas 11 han aga, Oktubre 20. Hi Dadizon in naghigot hin nylon cord ha iya liog ngadto han kisame han banyo han ira balay.

Subay han inisyal nga imbestigasyon, an biktima in usa nga LSI tikang ha Manila kun diin hiya nagtatrabaho. Umuli hiya ha Tacloban tungod han impormasyon nga mayda na iba nga lalaki an iya ka live-in partner. Katapos han iya kwarentina, pumakadto hiya han ira lugar ha Cabalawan ngan iya nakumpirmar nga tinood an impormasyon ug nakikigbulag na ha iya an iya live-in partner.

Sumala han mga paryente han biktima, duro an kabidu-an ni Dadizon ngan sugad-sugad nga nagpabati hin mga pamulong hin pagsarit nga malakat na hiya. Ini in nakagdurot hin kabaraka ha mga paryente, ug an ira duda in waray magsayop kay nagpakamatay an biktima.

Didto naman ha Babatngon, Leyte, binawi-an hin kinabuhi in duha nga kalalakin-an han bumunggo ha poste han koryente an motorsiklo nga ira ginsasakyan kanina han aga.

Ginkilala an mga biktima nga hira Ismael Biron ngan Freddie Abanes. Hira in nag-uukoy ha Brgy Naga-asan, Babatngon.

Banda alas 8 an oras, han aksidente nga mabunggo han ira motorsiklo an poste ha ligid han kalsada ngan nanhilabog an mga biktima. Subay han report didto mismo han lugar namatay hira Biron ngan Abanes.

Natabo an insidente ha pag-ultan han Brgy Naga-asan ngan Brgy Victory. An kapulisan in nag-iimbestigar pa han hinungdan kun kay-ano nabunggu-an man han motorsiklo an poste. #