(Photo by The Philippine Star)

Isumat.com/6:58AM, October 21, 2020

Talwas na ha peligro an tulo nga kasundaluhan han gobyerno nga nag-antos hin mga igo hin bala dida han natabo nga asdangay kontra han mga rebelde nga NPA ha Brgy Salvacion, Can-Avid, Eastern Samar, Oktubre 20 han aga.

Nagsering hi 8th Infantry Division Information Officer Captain Reynaldo Aragones nga nagpapatambal ha usa nga hospital ha Tacloban City an tulo nga nasamad ngan aada na ha maupay nga kahimtang an ira panlawas.

An mga tropa han 52nd Infantry Battalion in nagdudumara hin Security Operation didto han nasabi nga lugar han igkasurapo hira han mga rebelde nga komunista. Humagos hin pira ka minutos an pupsilay ngan kumalagiw an mga rebelde.

Kadagmitan nagpadara hin helicopter an pwersa armada basi kuhaon an samaran nga mga sundalo ngan madara ha hospital.

Nagtotoo an militar nga damo an nasamad han porlomenos 50 nga mga rebelde kay damo an turo han dugo dida han ira gin-agi-an han pag-eskapo. An mga tropa han gobyerno in naka-recover hin duha nga Improvised Explosive Device (IED) ngan mga blasting caps nga ginbayaan han mga rebelde.

Nagsering hi Aragones nga an mga sundalo in naghihimo han “clearing operation” dida han lugar basi magin talwas ngan mamurayaw an mga baryuhanon ngan mga tinaglawas han gobyerno. Buwas, Oktubre 22, nakatalaan unta nga magpadangat hin serbisyo ha agrikultura ngan iba pa nga mga programa an Provincial Government han Eastern Samar ngadto han lugar, sanglit nagkaada anay hin Security Operation an mga sundalo.

Kasumpay hini, mahugot nga ginkondenar han 8th ID an deri kanan tawo nga bunuhatan han mga rebelde. Sering pa ni Aragones, an gobyerno an nagpapadangat han mga programa para han kauswagan han mga baryuhanon, pero ini in ginsasamok lugod han NPA.

Ginsusnan pa ni Aragones an mga rebelde nga ginbabalewaray an kinabuhi han mga inosente nga sibilyan nga nanhihilakip han mga biktima han ira bayolente nga ginawi-an. #