(Photo by PCSO)

Isumat.com/Agosto 11, 2022

Katapos hin unom ka tuig nga pagtinaya han lotto, nagbunga na an inop hin usa nga misis tikang ha Iloilo nga magin milyonaryo.

Iginpasamwak han PCSO nga ginkubra na han 34-anyos nga Ilongga an jackpot prize nga 401, 186, 804 pesos para han bola han 6/55 Lotto hadton Hulyo 9.

Gin-claim han babaye an iya nadag-an nga salapi hadton Hulyo 25, 2022 ha PCSO Main Office ha Manila.

An 20 pesos han babaye an iya igintaya pinaagi han lucky pick ngan iya naswertehan an kombinasyon nga 2-18-49-7-19-47.

Waray igpahayag han PCSO kun ano an mga plano han winner han iya nadag-an nga minilyon-milyon ka pesos, labot la han pagsering han babaye nga para ini han kabubwason han iya pamilya.#