Isumat.com/Oktubre 14, 2022
Nagpapabilin nga marig-on an paglingkod ha trono han Leyte National High School (LNHS) Maroons komo kampeon han Rebisco 18 & Under Girls Volleyball Regional Championships.
An Maroons an naka-angkon han “4-peat” nga korona han torneo kataliwan nira makab-utan an sagunson nga upat ka beses nga pakadaog han titulo kakulop, Oktubre 13, 2022 ha CEO Gymnasium, Tacloban City.
Dida han engkwentro para han kampeonato, waray kalooy nga ginpalaprak han Maroons an New Ormoc City National High School Eagles ha takip-takip nga sets, 25-21, 25-16, 25-11, ngan malinangpuson nga nadepensahan han LNHS an ira titulo.
Paprehas tanan an eksena han tulo nga sets kun diin nakikigdukutay an Eagles ha Maroons ha syahan nga parte han set, pero pag-aabot ha kabutnga-an han kada set, tigda nga nagrarapido hin puntos an LNHS ngan nababari-an hin pako an mga Agila tikang ha Ormoc.
Ha panguna ni Team Captain Frenel Lyn Partulan, setter Arym Clarice Armada ngan Tournament MVP Sandy Patricia Demain, waray makaporma an Eagles tungod han maglagutob nga mga bunal ngan haros waray paltos nga depensa han Maroons.
Ha kabug-usa han kompetisyon, iginpasundayag han LNHS nga hira an poderoso nga team kay dida han unom nga mulay, waray hira maperde ngan waray nira iginsurender nga set ha ira mga kaatbang. Ngatanan han ira iginkakumbati an ira iginsagudsod pinaagi hin hayahay nga mga pagdarag-an.
Dida han semifinals, iginsawirik han Maroons an usa pa nga grupo tikang ha Ormoc nga amo an Ormoc Regional Sports Academy ha kartada nga 25-15, 25-15.
Tungod hini, an Maroons ha pag-giya nira coaches Prescillo Oladive ngan Irene Mercader Roa an magtataglawas na liwat han Eastern Visayas ha Rebisco National Finals igintalaan hiton Disyembre 2022 ha lugar nga waray pa pagngarani han tournament organizers.
Nakaghatag gihapon hin inspirasyon ngan kusog han Maroons an kasagaran han magkirita pinaagi han ira tagsatagsa nga pamilya, kasangkayan ngan mga ka-eskwela nga waray pagkakapoy han guli-at ngan siyagit pagpakita hin suporta ha LNHS.
An Ormoc Regional Sports Academy an nakakuha han 3rd place han ira paludhon an Jiabong National High School 25-17, 25-15.
Labot la han iya kapili nga MVP, hi Demain an natudlok gihapon nga 1st Best Outside Attacker. An iba pa nga gintagan hin pasidungog amo hira Nessangel Jabon han Jiabong NHS komo 2nd Best Outside Attacker; Cherish Dayame, Ormoc RSA – 1st Best Middle Blocker; Glejane Loreno, New Ormoc NHS – 2nd Best Middle Blocker; Zaira Dawn Pacure, LNHS – Best Opposite Attacker; Rhea Cabatingan, New Ormoc NHS – Best Setter; ngan Best Libero hi Zybelle Pacure han LNHS.
Umapi gihapon han torneo an St Joseph College of Maasin, Maasin City NHS, Balangkayan NHS, LNHS Junior Team – SPS, Calbiga NHS, ngan Abuyog Academy.
Ngatanan han teams ngan mga Individual Awardees in naka-agom hin mga produkto tikang ha Rebisco, sugad man mga medalya ngan tropeo.
Gindumara an kompetisyon ha ilarum han superbisyon ngan officiating ha panguna ni Mr Karl Chan, Presidente han Volleyball Association of Leyte-Tacloban City ngan kaapi han Phil National Volleyball Federation Board of Directors.
