Isumat.com/Oktubre 12, 2022
Duha nga kalalakin-an an naawat an kinabuhi ha magkalain nga insidente hin panigbas ha Calbayog City ngan Basey, Samar hadin nag-agi nga pira ka adlaw.
Ha Basey, Samar an bugto mismo han namatay nga biktima an gintudlok nga suspetsado han krimen. An namatay in ginkilala nga hi Erwin Padoc, 26 anyos, parag-uma ngan nag-uukoy ha Brgy Bulao han mao nga bungto.
Ginkilala naman an suspetsado nga hi Merwin Padoc, manghod nga bugto han biktima, waray asawa ngan residente gihapon han nasabi nga barangay.
Ha inisyal nga imbestigasyon, an magbugto in naglamay ngan nagkaada hin mapaso nga argumento samtang nagtatagay didto han lamay. Tungod han ira deri pagka-asya, gintigbas han suspetsado an iya kuya.
Nadara pa ha hospital an biktima, pero binawi-an gihapon han kinabuhi. Ha luyo nga bahin, an kapulisan han bungto in padayon an pamiling han gintatahapan nga umiskapo dayon katapos han insidente.
Didto naman ha Calbayog City, usa gihapon nga parag-uma an namatay ug an suspetsado in usa nga barangay kagawad.
Ginkilala an biktima nga hi Artem Leano, residente han Brgy Hibatang han nasabi nga syudad; samtang an suspetsado hi Jeffrey Dealagdon, 31 anyos, inasaw-an ngan kagawad han mao nga barangay.
Natabo an panigbas hadton pasado alas 6 han gab-i han Oktubre 6, 2022. Waray pa matudlok han mga imbestigador an motibo han krimen samtang ginsusurat ini nga balita.
An suspetsado in sumurender ha mga otoridad katapos han panhitabo. #
