Isumat.com/ Nobyembre 11, 2022
Madedelatar an pagbista ngan pagkaada hin resolusyon han mga kaso hin murder ngan frustrated murder kontra han siyam nga anay PNP Officers nga nahilambigit han pagpataya kan anay Calbayog City Mayor Ronald Aquino ngan tulo pa nga iba.
Ini in kataliwan la nga mag-inhibit o binul-iwan ni Judge Reynaldo Clemens han RTC Branch 31-Calbayog City an pagkapot han nasabi nga mga kaso.
Ha interview han Samar Daily News Online, iginbuyagyag ni Atty Alma Uy-Lampasa, abogado han mga biktima, nga dida han katapusan nga adlaw han petition for bail hearing kakulop, Nobyembre 10, 2022, hi Clemens in nagpahayag ha open court nga deri na hiya magkakapot hini nga mga kaso.
Nagsering hi Uy-Lampasa nga kun amo ini an kahimtang, deri la anay makiwa o ma-unhan an proceedings han kaso kay waray man huwes nga magkakapot hini.
Hi Clemens in kinahanglan pormal nga magpasabot ha Korte Suprema han iya pag-inhibit basi makagbiling an Supreme Court hin bag-o nga huwes para han kaso, pahayag pa ni Uy-Lampasa.
Hi Uy-Lampasa in nagklaro nga waray nag-aro nga mag-inhibit hi Clemens, kundi personal ini nga desisyon han huwes.
Hapagkayana, tungod kay waray man huwes hini nga kaso, deri madedesisyunan an petisyon han mga akusado nga tugutan hira makagpiyansa, ngan deri gihapon madedesisyunan an mosyon han PNP-CIDG nga deri na hira magkapot han kustudiya han mga akusado ngan igbalhin na hira ngadto han karsel nga gindudumara han BJMP.
Nagtotoo hi Uy-Lampasa nga posible “na-irita” ha iya hi Clemens tungod han iya mosyon nga ig-invalidate han korte an hangyo han lima dida han siyam nga akusado nga makagpiyansa hira. Sumala kan Uy-Lampasa, deri na angay pamati-an pa han korte an petisyon han lima nga akusado kay hadto pa iginbaliwaray na ini han husgado.
Tobtob han ginsusurat ini nga notisya, waray pa opisyal nga dokumento nga iginpagawas hi Clemens kasumpay hini nga iginsumat han abogado han mga biktima nga nag-inhibit na an huwes ha pagkapot han high-profile nga mga kaso.
Waray pa gihapon reaksyon an kampo han mga akusado hini nga desisyon han huwes.#
