Isumat.com/11:55AM, June 3, 2020
Nagtitikadamo na an mga lugar ha Eastern Visayas nga nadadarahigan han COVID-19. Ini in dara kay mayda na positibo nga kaso han virus hin usa nga tawo ha bungto han Naval, Biliran.
Dida han iya post ha facebook deri pala maiha, hi Biliran Governor Rogelio Espina in nagpasabot nga usa nga estudyante nga taga Naval an na-stranded ha Baguio City ngan pag-uli niya ha Biliran hadton Mayo 27, ginkuhaan hiya hin swab sample ngan gumawas ha laboratory test nga positibo hiya han virus.
Ini an syahan nga kaso han corona virus ha probinsya han Biliran. Iginpatapod naman ni Espina nga tikang han pag-abot hini nga tawo ha Biliran, igin deretso na hiya Quarantine Facility ngan waray iginka-urusa nga iba nga tawo labot la han mga health officials.
Sumala pa han gobernador, waray ginpapakita nga sintomas han sakit ini nga tawo. Nanawagan gihapon hi Espina ha mga Biliranon nga deri mag-panic kay ginhihimo han gobyerno lokal an ngatanan basi deri ini magsarang nga kagaw ha ira lalawigan.
Mayda naman mga surok an Isumat.com in nagsering nga nagbyahe ini nga tawo tikang ha Baguio tipakadto ha Manila ngan sumakay na liwat hin pribado nga behikulo para ha Tacloban ngan sumakay hin pampubliko nga sarakyan tipakadto ha Naval.
Nagdudumara na yana hin contact tracing an mga otoridad basi matudlok an mga indibiduwal nga iginka-urusa hini nga Biliranon. # (KEVIN SIOSANA)
