Isumat.com/8:07AM, October 21, 2020
Kadam-an han mga ginkawat nga motorsiklo ha Sinirangan Bisayas in na-recover han mga otoridad ngan nahibalik na ha mga tag-iya hini.
Dida han pahayag han tagpamulong han Highway Patrol Group-Region 8 ha iFM-RMN Tacloban, 27 han 30 nga iginreport ha ira nga kinawat nga motorsiklo an nahibalik na ha mga tag-iya pinaagi han operasyon han buhatan.
Igindugang pa han HPG nga nasampaan na gihapon hin kaso an mga nanhidabi han krimen ug an iba hini ginbibista na ha korte.
Kadam-an han mga nabiktima han pagkawat hin motorsiklo in denhi ha Tacloban ngan pira nga lugar ha Southern Leyte, sumala pa han HPG.
Kasumpay hini, utro nagpahinumdom an HPG ha mga tag-iya han motorsiklo nga didto igparada an ira sarakyan ha mga lugar nga damo an tawo, ig-lock ini hin maupay ngan deri gud hingalimtan pagkuha han yawi han motorsiklo.
Nagpasabot gihapon an HPG nga kun mawara an motorsiklo o ano man nga sarakyan, igpa-blotter anay ini ha Police Station antis kumadto ha HPG pangaro hin bulig basi ma-recover an sarakyan. Kinahanglan gihapon magdara hin mga dukumento nga magpapamatuod han panag-iyahan han sarakyan.
Sagdon pa han HPG ha mga motorista, an photocopy la han mga papeles an dad-on ha sarakyan, kay ingkaso kawaton an sarakyan, an orihinal nga kopya han mga dokumento in aadto pa han tag-iya.
Nagpasalamat gihapon an HPG ha mga sibilyan ngan mga Police Office ha mga bungto tungod han ira bulig paghalpat han mga kawatan han motorsiklo. #
