(File Photo)

Isumat.com/7:21AM, October 21, 2020

Ha deri maiha nga panahon, magtitikang na an operasyon han Ormoc Molecular Testing Laboratory kun diin igpo-proseso an mga swab samples para masabtan kun positibo o negatibo an usa nga tawo han Covid-19.

Kakulop, Oktubre 20, gindumara an inagurasyon han nasabi nga laboratoryo nga namumutang ha OSPA-Farmers Medical Center. Nagsering hi Mayor Richard Gomez nga ginhuhulat nala yana an akreditasyon han facilidad basi makagtikang na an operasyon hini.

Sumala kan Gomez, an mga papeles para han akreditasyon an iginpadara na ngadto han Covid Testing Chief Vince Dizon basi ma-aprobaran na. Tatawagan han alkalde hi Dizon basi maghangyo nga katagan na hin akreditasyon an facilidad ha madagmit nga panahon.

An nasabi nga laboratoryo an ginburubligan han City Government, an nagdudumara han OSPA-FMC ug an Energy Development Corporation (EDC) han Lopez Group of Companies. An OSPA-FMC an nagpatukod han building balor hin 5 Milyones pesos, samtang an EDC an nagdonar han Testing Machine nga kantidad hin sobra 10 Milyones pesos.

An PASAR Corporation ha Isabel, Leyte in naghatag gihapon han mga Testing Kits nga gagamiton han laboratoryo.

Pira na ka bulan an nag-agi, an mga personales han laboratoryo an natapos han ira training didto ha Cebu City. Kun magtikang na an operasyon hini, an mga swab samples ha Ormoc ngan paghagrani nga mga bungto in deri na igpapadara ha EVRMC Laboratory ha Tacloban.

Samtang, nagpapadayon an paghinataas han mga kaso han virus ha Calbayog City, Maasin City ngan Laoang, Northern Samar. Ini nga tulo nga lugar an gidadamu-i an nahireport nga natapnan han kagaw kakulop, Uktobre 20.

An Calbayog in nadugangan hin 14 kun diin kadam-an mga taga Brgy Obrero. 459 na an kaso han Covid didto han syudad ngan yana mayda 154 an Active Cases.

Ha Maasin City, 20 an bag-o nga Covid Patients. An syudad an iginpa-ilarum ha Modified Enhanced Community Quarantine (MECQ) tikang Uktobre 20 tobtob Nobyembre 3, 2020. An mga LSI tikang ha gawas han rehiyon in deri gihapon tutugutan maka-uli ha Maasin dida hito nga mga petsa.

Igin-implementar naman an Enhanced Community Quarantine (ECQ) ha unom nga barangay ha Laoang, Northern Samar tikang yana tobtob Nobyembre 4, 2020. Kakulop, mayda 14 nga bag-o nga kaso han Covid an munisipalidad. Porlomenos 100 na an natapnan nga residente han bungto ngan maabot hin 80 an Active Cases yana.

Na-obserbaran naman nga nagtitikahabubo an mga kaso ha Tacloban City han nag-agi nga duha ka semana. Bisan kun sobra na 800 an natapnan nga Taclobanon, naka-recover na an 790 ngan 64 nala an aktibo nga kaso.

Ha bug-os nga Eastern Visayas, 5,981 na an Total Cases ngan 5,092 (85%) an naka-recover. Hapagkayana, 832 an Active Cases ngan 57 an namatay nga natapnan han kagaw. #