Imbes nga maiibanan, nagtitikadamo lugod an katawhan denhi ha Rehiyon Otso nga nag kaka-ada han sakit nga Human Immunodefeciency Virus (HIV) .

     Ini in bisan ha atubangan han mahugot nga kampanya han Department of Health sugad man magkalainlain nga sektor basi kalikyan ini nga makamaratay nga sakit nga amo iton nagigin hinungdan han Acquired Immuno Defeciency Syndrome (AIDS).

     Nagpahayag an Regional Office han DOH nga dida han naglabay nga tuig, mayda 180 nga bag-o nga HIV cases denhi ha Sinirangan Visayas.  Dida hini nga mga kaso, 85 an nahipatik tikang ha Leyte, 36 ha Northern Samar, 23 ha Samar, 15 ha Eastern Samar, 13 ha Biliran ngan walo ha Southern Leyte. Waray pa hini labot an mga biktima nga waray magpa hospital.

     In inga ihap han mga HIV carrier in mas hitaas hin trese porsyento kun igtatanding han mga kaso hadton 2018 nga mayda 156 ka tawo.

     Nagawas gihapon dida han record ha DOH nga nubenta porsyento han mga natapnan hini nga HIV amo in mga kalalakin-an nga nag-eedad hin 18 tobtob 72 anyos. Tikang han 1989, 966 na an kaso hin HIV ha Region 8.

     Kasumpay hini, nagsering an DOH nga an nagunguna nga mga rason han pakadarahig hini nga sakit amo an tinatawag nga unsafe sex o deri talwas nga pakighilawas, an pagka-ada hin damo nga sex partners ug an paghilawas hin igkasi lalaki.

     Gin-aaghat naman han DOH an bisan hin-o nga deri magruhaduha pagdaop ha ira ahensya basi magpa ilaum hin HIV testing nga waray bayad ngan kun mag positibo, mayda liwat ighahatag nga kaangayan nga medesina an departamento. #