Ha deri maiha nga panahon, magigin hayahay na an pagbyahe tikang ha Southern Leyte ngadto ha Northern Samar, kay iglalansad na han Metro Davao Shuttle an ira moderno nga mga bus nga magseserbe hini nga ruta.

Subay han impormasyon nga nahikay han Isumat.com, ini nga mga bus in mabyahe tikang ha Ro-Ro Port Terminal ha Benit, San Ricardo, Southern Leyte tikadto ha Port of Allen, Northern Samar ngan pabalik. Hapagkayana, waray pa opisyal nga petsa han pagpatikang hini nga operasyon pero nagsering an surok nga diri na ini magdudugay.

Iginkalipay naman ini han mga commuters ilabi na an mga lugar nga pagsusulsugon hini nga mga bus kay diri na hira kukuri-an ha transportasyon labi na an mga lugar ha Southern Leyte nga kulang hin sarakyan nga tipakadto ha Leyte ngan Samar.

Kun magtikang na ini nga operasyon, maagi ini ha mga bungto han Southern Leyte sugad han San Ricardo, Pintuyan, San Francisco, Lilo-an, Libagon ngan Sogod, kataliwan maagi ha Mahaplag, Leyte deretso na ha Tacloban City, pira nga bungto han Samar antis pa umabot ha Allen, N. Samar. Ini nga ruta in makakasakop hin upat nga probinsya han Eastern Visayas.

Labot la nga dako an mahibubulig hini ha mga manarakay, dako gihapon nga bentaha an igdudurot hini ha industriya han turismo ha nasabi nga mga lalawigan.