Isumat.com/Hunyo 2, 2022
Magpapadayon an paningkamot han mga taga Hinunangan, Southern Leyte nga mamintenar an kalimpyo han ira kadagatan katapos la nga ma-angkon han ira bungto an ikaduha nga pwesto dida han pa-isan-isan han Bureau of Fisheries and Aquatic Resources (BFAR) nga Malinis at Masaganang Karagatan (MMK).
An nasabi nga kompetisyon ngan pag-anunsyo han mga nagdaog an gindumara dida han selebrasyon han Month of the Ocean hadton Mayo 31, 2022 ha Pasay City.
Tungod hini nga pasidungog, an LGU-Hinunangan in makarawat hin 18 milyones pesos kantidad hin livelihood projects para han pangisda. Ini in labot la han plake ngan tropeo nga iginhatag gihapon.
An 1st Placer amo an bungto han Prieto Diaz ha Sorsogon nga naka-angkon hin 30 Milyones balor hin livelihood projects; samtang 10 Milyones pesos naman an ngadto ha LGU Libertad, Antique nga amo an 3rd Placer.
Ini nga kompetisyon amo an pagkilala han nangunguna nga mga bungto ha pag-implementar hin mga pitad ngan programa para han tinatawag nga “best practices in coastal and fisheries management.”
50 nga mga bungto ha bug-os nga nasud an mga nominado para han mga awards ug amo adto an tulo nga LGUs nga nanguna han MMK Competition.
Ha bungto han Hinunangan makikit-an gihapon an mga isla han San Pablo ngan San Pedro nga bantuganan nga destinasyon han mga turista ngan bakasyunista. #
