Isumat.com/Hunyo 3, 2022

Labot la han kaso kriminal, posible nga umatubang gihapon hin kaso administratibo hi Fire Officer 1 Karla Rodriguez tungod han alegasyon nga nangaro hiya hin kwarta tikang hin aplikante nga karuyag makasulod ha ira ahensya.

Ha interview han iFM-RMN Tacloban kan Chief Supt Rodolfo Denaga, Regional Director han Bureau of Fire Protection, iya iginsaysay nga an Internal Affairs Service han ira opisina in mayda kalugaringon nga imbestigasyon han insidente ngan kun mapamatud-an nga may mabug-at nga rason kontra han Rodriguez, ira igsasalawad an kaso administratibo kontra han suspetsado.

Nagsering hi Denaga nga posible tulo ka semana tobtob usa ka bulan an ira pagsusi ngan kataliwan hini, an Internal Affairs in magsusubmiter han rekomendasyon kun ano an mga pitad nga angay buhaton kontra han iginrereklamo.

Nagsaad an opisyal nga waray nira sasantuhon dida han imbestigasyon ngan ira gud uutingkayon an ngatanan nga anggulo basi mabukwat kun may nalalambigit nga mga opisyales han BFP hini nga kaso.

Hi Denaga in nag-asoy gihapon nga maaram na an BFP National Headquarters hini nga panhitabo ngan ginmanduan hira nga limpyuhan an ira ahensya kun mayda mga binugok nga mga personales. Iya pa igindugang nga deri hira matugot nga may mga peronales ha ira ahensya nga nagbubuhat hin mga tinuyaw.

Ginklaro naman ni Denaga nga waray igpailarum ha preventive suspension hi Rodriguez samtang gindudumara an imbestigasyon kay waray kapas hi Rodriguez nga maka-impluwensya han proseso kay FO1 man la an iya ranggo.

Hi Rodriguez in nadakop ha usa nga entrapment operation nga gindumara han PNP=CIDG Regional Field Office hadin Mayo 28, kun diin na-aktuhan hiya nga nakarawat hin kwarta tikang hin aplikante ka bumbero.

An CIDG in nagsampa na han reklamo nga pakasupak han Anti-Red Tape nga balaud kontra han suspetsado ha piskaliya. Hi Rodriguez nga nakadestino ha BFP-Guiuan, E. Samar in nakagpiyansa sanglit nakagawas hiya ha karsel. #