Isumat.com/Hunyo 2, 2022

Nabarahunog yana an mga sumat-sumat nga sobra 20 nga mga opisyales hin magkalainlain nga barangay ha syudad han Calbayog an magdedemiter ha katungdanan.

Dida han report han Samar Daily News Online, porlomenos 27 nga Barangay Officials han mao nga syudad an nagpaplano pag-resign, matuod ini nga notisya in waray pa makukumpirmar.

Naha-una hini, hi Marcelina Aquino, Chairwoman han Brgy San Policarpo, Calbayog in nagpadangat han iya resignation letter ngadto ha DILG Samar Provincial Office.

Hi Aquino an misis han pinatay nga alkalde han syudad Ronald Aquino. Waray pa igpahayag han DILG kun ano an rason han pag-resign ni Aquino komo Chairwoman.

Sumala hin pira nga tag-obserbar, posible nga an pitad han kapitana in pagtuman han iginpahayag han iya anak nga Dr Clarence Aquino nga gintatalikdan na han ira pamilya an pulitika.

Hi Dr Aquino in kumandidato ka Vice Mayor han syudad dida han Mayo 9 nga eleksyon pero hiya in naperde.

Katapos han pinili-ay, hiya in nagsering nga deri na maapi ha pulitika an ira pamilya. Sering pa niya, ura-ura na an ira pagserbe ngan sakripisyo para han mga Calbayognon, upod na an kinabuhi han ira tatay, sanglit mabalik na hira ha simple ngan mamurayaw nga kinabuhi.

Hadton Marso 2021, grupo hin armado nga kalalakin-an an nag-ambush ngan nakamatay kan Mayor Aquino. Hinsabutan nga an mga suspetsado in mga opisyales han PNP ngan yana naatubang hira hin mga kaso ha korte. #