Isumat.com/Hulyo 20, 2023
Nagdara hin dako nga onor para han bungto ha Palo, Leyte ngan DepEd-Palo an Grade 10 student nga hi Heavenne Bihag han mapili hiya nga Most Outstanding Campus Journalist-Secondary Level han gindumara nga National Schools Press Conference (NSPC) han Department of Education ha Cagayan de Oro City han yana nga semana.
Hi Bihag nga magkokolehiyo na ha masulod nga school year amo an Editor-in-Chief han The Cradle, an school paper han Palo National High School. Sumala han report nga nahikay han IsumatNews, hiya in produkto han Special Program In Journalism han DepEd-Eastern Visayas.
Antis han National Competitions ha Cagayan de Oro, hi Bihag in natudlok gihapon nga Most Outstanding Journalist in Secondary dida han Regional Schools Press Conference ha Dolores, Eastern Samar hadton Mayo 2023 kun diin an ira school publication an nagdaog nga Best School Paper in English.
Naka-angkon gihapon hi Bihag hin iba pa nga mga awards ha TV Broadcasting contest dida han nasabi nga paisan-isan ha Eastern Samar, sugad man han Leyte Division Press Conference ha Jaro, Leyte.
Hinsabutan gihapon nga hi Bihag an gisasyahani nga Palon-on nga naka-angkon han nasabi nga award dida han NSPC, ngan tungod hini madinasigon nga iginkakaparayaw han bungto sugad man han iya eskwelahan ngan pamilya an iya nakab-utan nga pasidungog. #
