Isumat.com/Hulyo 20, 2023
An kamadalunot han kalsada tungod han pag-inu-uran an gintutudlok nga rason han ka-aksidente ngan kaawat han kinabuhi hin usa nga opisyal han LGU-Jiabong, Samar hadin Hulyo 18, 2023.
Ha report han PNP Regional Office, ginkilala an biktima nga hi Jefferson Gabieta, 35 anyos, inasaw-an ngan residente han Brgy Alejandria han mao nga bungto. Hiya in usa nga enhinyero ngan Municipal Agriculturist han LGU.
Natabo an insidente banda alas 7 han aga ha Brgy Macabetas han nasabi nga munisipalidad.
Subay han imbestigasyon, hi Gabieta in nagmamaneho han iya motorsiklo hadto nga takna kun diin mauran didto han mao nga lugar. Samtang nagsusulsog hiya han kalsada ti-uli na unta ngadto ha ira panimalay, nag-slide an kaliding han motorsiklo tungod han kamadalunot.
Nagresulta ini han katumba han sarakyan kun diin nag-antos hin karamtan ha ulo an biktima. Kadagmitan nga gindara an biktima ha Samar Provincial Hospital pero samtang gintatalinguha nga katagan hiya hin atensyon medikal, binawi-an hin kinabuhi an nasabi nga opisyal. #
