Isumat.com/Agosto 25, 2022

Iginpasamwak han Archdiocese of Palo nga waray koneksyon ha Romano Katoliko nga Singbahan sugad man ha Archdiocese an grupo nga Filipino Katoliko Inc.

Nagsering an opisina han Arsobispo han Palo nga nakadangat na ha ira an impormasyon mahitungod hini nga grupo nga nagsusudoy-sudoy ngan nangangaro hin donasyon ha mga Katoliko.

Mayda na nagpapaki-ana ha Acrhdiocese kun tinood ba o legal an aktibidad han kapadi-an hini nga Filipino Katoliko Inc. An iba liwat nga katawhan in nagugupong kun ano gud ini nga grupo.

Ginklaro han Archdiocese nga ira iginrerespeto an katungod hin bisan hin-o o ano man nga grupo nga mangaro hin donasyon, pero igindig-on han Archdiocese nga deri konektado ha Roman Catholic Church ini nga grupo.

Naghahangyo gihapon an Archdiocese ha ngatanan nga Katoliko ha mga paruko nga pasabuton an igkasi mga Katoliko nga waray kalabutan an Archdiocese of Palo han mga gi-os han nasabi nga grupo. #