Isumat.com/ 9:18AM, September 5, 2020

Suagad han nahitabo ha iba nga mga syudad ngan bungto, “Pwera-Bisita” gihapon an igpapasunod ha Calbayog City, Borongan City, Dulag, Leyte ngan Las Navas, Northern Samar nga magdudurungan pagsalin-urog han fiesta didto hiton Setyembre 7-8, 2020.

An nasabi nga mga syudad ngan bungto an magtitigaman han Our Lady of Nativity ni Birhen Maria.

Tungod han kadelikaduhan durot han Covid-19, an mga Local Government Units han nasabi nga mga lugar an nagdesisyon nga deri puede makasulod ha ira syudad ngan bungto hito nga mga adlaw an bisan hin-o nga deri nag-uukoy didto han lugar.

Ini in agud kalikyan an padayon nga pagsarang han ginkakahadlukan nga kagaw kun diin natatabo na an local transmission ha damo nga lugar ha Eastern Visayas. An puede la makasulod an mayda emergency nga mga panuyo ngan mga personales nga gintagan hin otoridad nga magmonitor han sitwasyon.

Nababatasanan han mga katawhan ha Sinirangan Bisayas an pira ka adlaw nga mga pagrisyo ngan aktibidadis antis an pista pero yana ngatanan ini ginkanselar. Kun mayda man mga kompetisyon, ini an iginpapa-agi nala ha On-Line Contest.

Gintutugutan an relihiyoso nga aktibidadis pero tikang la ha 25 ngadto ha 50% ha kapasidad an pasusudlon ha singbahan. Ginsagdunan gihapon an mga residente nga mag-andam hin pagkaon para la han pamilya ngan deri mag-inirignom.

Labaw nga iginsasagdon an pagpasalamat ngan pag-ampo ha Makagarahum nga makatalwas an katawhan han krisis nga gin-aatubang yana han bug-os nga kalibutan.