(File photo world press.com)

Isumat.com/8:43AM, September 05, 2020

Kinahanglan waray pipili-on ha pagdakop han ngatanan nga nagbubulang o nagtutupada ha bug-os nga Northern Samar subay han mahugot nga kasugu-anan ni Gobernador Edwin Ongchuan.

Utro minanduan ni Ongchuan an mga kaapi han PNP-CIDG nga arestuhon ngan kasuhan an ngatanan nga nagtutupada ngan waray pasasayloon. Ini nga pandakop in kinahanglan waray konsiderasyon.

Igindig-on han gobernador nga bisan ano pa an estado ha sosyedad angay gud dakpon kun nagtutupada kay igindederi ini ha panahon han pandemya. Deri angay mag-alang pagdakop an mga otoridad bisan pa kun abogado, piskal, negosyante, kontraktor ngan opisyal ha gobyerno. Waray palulusuton kun nakikigbulang, sering pa han amay han mga Nortehanon.

Dida han nakalabay nga Setyembre 2, upat nga kalalakin-an ha bungto han San Jose an nagpositibo han Covid-19. Hira in mga close contacs hin naha-una nga natapnan han kagaw.

Ginkakabarak-an nga posible makatapon pa hin iba nga tawo ini nga kalalakin-an kay nagtambong hira hin derby ngan pira nga mga patupada.

An Total Cases ha Northern Samar in aada na ha 116 kun diin 65 an Active ngan 51 an naka-recover. an 28 nga kaso ha Catarman amo an gidadamu-i dida han mga munisipalidad han probinsya. Usa han natapnan nga taga Catarman hi 1st District Congressman Paul Daza. #