Magkalain-lain an epekto han COVID-19 ha publiko. Mayda class suspensions, kanselasyon han Palarong Pambansa ngan iba pa nga sporting events sugad man mga katitirok.
Sanglit tungod han iginpalusad nga Proclamation No. 922 han Malakanyang nga nagpapa-ilarum han bug-os nga nasud ha State of Public Health Emergency basi masurapo an pagsarang hini nga sakit, nagdesisyon an Civil Service Commission nga deri la anay pagbuhaton an Career Service Examination-Pen and Paper Test nga nakatalaan unta dida hiton Domingo, Marso 15, 2020.
Hinungdan hini, ginsasagdunan han CSC an mga makuha unta hini nga Professional ngan Sub-Professional Exam nga deri na pumakadto ha mga testing centers nga namumutang ha mga syudad han Tacloban, Borongan, Calbayog ngan Ormoc. An CSC in magpapasabot nala ha maabot nga mga panahon kun san-o pagbubuhaton an nasabi nga eksaminasyon.
Samtang, nag-anunsyo gihapon an LEYECO II nga diri madadayon an naka eschedule nga Power Interruption o blackout ha ira service coverage area dida hiton Marso 15. Kun aton manunumduman, nagpasamwak na an kooperatiba nga an National Grid Corporation of the Philippines (NGCP) in mag-aayad ngan manliliwan hin mga poste han koryente nga nasasakupan han LEYECO II, sanglit mawawarayan hin koryente tikang alas 6 han aga tobtob alas 6 han gab-i.
Pero naghangyo an CSC pinaagi ha LEYECO II ngadto ha NGCP nga deri igpadayon an ira maintenance activity ha ira mga linya tungod han naka schedule nga eksaminasyon. Gin-abuyunan han NGCP ini nga hangyo han CSC, pero natabo ini antis pa an proklamasyon han Malakanyang han Public Health Emergency.
Dara hini, kakulop Marso 10, nagdesisyon an CSC nga deri na igpapadayon an eksaminasyon ha Marso 15 komo pagsunod han kamanduan ni Presidente Duterte. Ha atubangan hini, nagpabilin naman an desisyon han NGCP nga deri igdadayon an ira maintenance activity sanglit waray power interruption nga matatabo hiton Marso 15 ha Tacloban, Babatngon ngan Palo nga ginseserbisyuhan han LEYECO II. #
