(File photo by facebook.com)

Isumat.com/8:23AM, June 11, 2020

Nag-aandam na an Regional Office han DSWD para han panhatag hin ayuda pinansyal ngadto han mga kwalipikado nga pamilya pero waray makatagamtam han cash assistance ha ilarum han Social Amelioration Program (SAP).

Iginpahayag han DSWD nga tatawagon ini nga Emergency Subsidy ngan igdidistribuer ngadto han mga waitlisted o waray katagi han syahan nga arangkada han SAP. Ini nga mga beneficiario in waray maka-agom han syahan nga panhatag kay limitado man an slots nga ginpondohan han gobyerno.

Hapagkayana, padayon nga naghuhulat an DSWD han mga listahan tikang ha mga Local Government Units. Subay han Memorandum Circular #4, an mga LGUs an may obligasyon pagtudlok han mga kwalipkado nga pamilya nga igbubutang ha waitlisted.

Ginpapanawagan gihapon han ahensya an mga LGUs nga magsubmiter na han mga rekisitos para han liquidation han 1st tranche basi deri madelatar an panhatag han Emergency Subsidy.

Subay han Executive Order 112 ni Pangulo Duterte, an mga kwalipkado nga pamilya in makarawat han 2nd Tranche kun an ira lugar in aada ha Enhanced Community Quarantine tobtob han Mayo 30, ngan makaka-agom liwat an waray makakarawat han syahan nga panhatag.

Waray pa igintalaan nga petsa kun san-o ini igpapanhatag nga ayuda pinansyal tobtob han ginsusurat ini nga notisya. # (KEVIN SIOSANA)