Isumat.com/8:40AM, June 16, 2020
Waray na ikaduha nga hugna han panhatag han tag-singko mil nga ayuda pinansyal ha ilarum han Social Amelioration Program han gobyerno para han mga beneficiario ha Eastern Visayas.
Sumala han pahayag tikang ha DSWD Regional Office, deri na lakip an rehiyon han makakatilaw han SAP 2nd Tranche. Pero manhahatag naman han SAP Emergency Subsidy nga cash assistance para han mga waitlisted.
Ini nga aada ha waitlisted an mga kwalipikado nga mga beneficiario nga waray makatagamtam han syahan nga panhatag. An DSWD an nagmando ha mga Mayors han LGU nga magsubmiter han mga ngaran para han waitlisted. Waray liwat mahisumat kun pira an kantidad nga ighahatag para han Emergency Subsidy ha waitlisted.
Kadam-an naman nga nitizens an nagpahayag hin ka-diskuntento hini nga desisyon han gobyerno. Sering nira, yana lugod nga nagtitikadamo an natatapnan han corona virus, amo pa an kaanaw han ira paglaum nga makakarawat utro han SAP.
Nagin sentro gihapon hin kontrobersiya ini nga SAP tungod han mga akusasyon nga may ginpapaboran han mga barangay kapitan nga naka-agom han ayuda bisan kun deri kwalipikado. Mayda liwat mga alegasyon nga gin-ibanan an kantidad han cash assistance.
Sobra usa ka gatos nga LGU ngan barangay officials an ginsampaan hin kaso han DILG dara han alegasyon nga pakasupak han mga guidelines dida han distribusyon han ayuda pinansyal. # (KEVIN SIOSANA)
