(Image by kractivist.org)

Isumat.com/8:05AM, June 16, 2020

Magpapadayon an implementasyon han Modified General Community Quarantine (MGCQ) ha bug-os nga Eastern Visayas. An National Inter-Agency Task Force (IATF) in nagrekomendar nga pahilawigon pa tobtob Hunyo 30 an MGCQ ha aton rehiyon ngan gin-aprobaran ini ni Presidente Rodrigo Duterte.

Ini nga desisyon han Malakanyang an mahuyayag nga ginkarawat han mga opisyales han rehiyon nga amo gihapon an hingyap nga igpadayon an MGCQ basi magpabilin an istrikto ngan hingpit nga pagpasunod han mga health protocols.

An Sinirangan Bisayas in mayda na yana 205 ka tawo nga nagpositibo han COVID-19 ngan sobra na trenta ka tawo an naka-recover. Waray naman naawat an kinabuhi ha rehiyon dara hini nga kagaw.

Samtang, iginbutang naman ha Enhanced Community Quarantine an mga munsipalidad han Lapaz, Leyte ngan Libagon, Southern Leyte. Ini in magigin epektibo tobtob Hunyo 30. Nagdesisyon an mga alkalde han duha nga bungto nga igbalik an ECQ basi magdumara hin contact tracing ngan deri na madugangan pa an Positive Cases ha ira lugar.

An La Paz in mayda 11 ka tawo nga natapnan han kagaw ug igindeklarar na nga mayda local transmission, samtang an Libagon in mayda tulo ka tawo nga tikang ha iba nga lugar an nagpositibo.

Didto naman ha Ormoc City, tulo nga sitio an iginpa-ilarum ha lockdown tungod han pagpositibo hin tulo nga residente nga waray sumunod han mga patakaran han LGU. Ini an Purok 6 ha Brgy Bagong Buhay, Block 1 ha Palmville Brgy Tambulilid, ngan Holy Wing ha Brgy Tambulilid.

Ha bungto naman han Kananga, igin-lockdown an Sitio Boski ha Brgy San Isidro ngan Sito Kalipay ha Brgy Kawayan. Maghihimo hin contact tracing an LGU kay mayda residente hini nga lugar nga iginka-urusa ha byahe han Positive Case ha Ormoc. # (KEVIN SIOSANA)