TACLOBAN CITY- Patay an driver han usa nga Construction Company mahuman nga masabugan han guintanom nga imporived explosive device ( IED) han mga guintutuuhan nga rebelde grupo ha kabukiran nga parte han Barangay San Jorge, Las Navas, Northern Samar.
Guinkilala han mga otoridad an biktima nga hi Henry Soriano y Sendana, 38 anyos an pangidaron ngan residente han Mangaldan, Pangasinan.
Basar ha inisyal nga report han Las Navas PNP , nga sakay an biktima ha guinmanihuan hini nga sarakyan ha mao nga barangay kun diin sakto naman an pagbuto han natura nga bomba nga naging hinungdan han dagmit nga pagkamatay han biktima.
Guintutuuhan nga binuhatan han rebelde nga grupo an guintanom nga bomba ha mao nga lugar.
Subay ha usa nga opisyal han Militar an mao nga buruhaton han daw mga rebelde in pagpamatuod la han kawaray na hin pagrespeto ngan importansya ha kinabuhi han tawo ngan usa nga dako nga pagtalapas ha Komprehensibo nga Kasarabutan ngan pag-atiman ha Katungod pantawo ngan International Humanitarian Law.
Kasumpay hini, gin-aghat naman han Armed Forces of the Philippines an mga katawhan nga mag-ikmat ngan maging mabinantayon sugad man maging alerto ngan igreport layun an mga mayda urusahon an gingigios.
