TACLOBAN CITY – Gin-amin han 15 anyos nga suspek nga nagpatay han 20 anyos nga babayi ha Baranggay Sta. Margarita, Hilongos, Leyte nga rasun han nabuhat nga krimen tungod nga umato daw ha iya an mao nga babayi.
Ha pakighimangraw han isumat.com kan PSInsp Ronald Espina, Hepe ng Hilongos PNP, waray na hini ginpangaranan an suspek tungod nga menor de edad pala ini.
Samtang an biktima naman in ginkilala nga hi Joan Yatasa Banquil, usa nga Grade 11 han Sta Margarita National Highschool nga naguukoy han Baranggay San Isidro.
Nabaruan nga nagbabaktas la pauli an mao nga biktima porlominos 3 Kilometro an kahirayo tikang ha ira balay pakadto ha eskwelahan.
Subay ha naging pahayag han suspek ha mga Kapulisan nga maiha na daw niya nga “crush” an 20 anyos nga daragita amo nga han makit-an ini nga mag-usan nga naglalakat in nakahigayon hiya nga daupan.
Han testingan niya nga pagkapti han biktima in tigda dawla ini nga dumalagan nga iya naman ginlanat ngan kutob umabot nga nagkamaul-ulay an mga ini ngan higayon nga nabuno ini niya ha magkadurudilain nga parte han lawas gamit an Kutsilyo.
Tigda naman ini nga pumalagiw mahuman an insidente.
Pero sumala kan Espina nga mismo an mga Klasmate han biktima an nakakita han mao nga panhitabo.
Naidara pa daw ini ha Hospital pero waray mag-iha in naawatan ini hin kinabuhi tungod han naangkon nga grabe nga samad ngan buno ha lawas.
Dugang pa ni PSI Espina nga ha ira pagpanginano in negatibo ha magpakahurubog o Iligal nga droga an mao nga suspek.
Pero basar ha record in kilala nga Notorious an suspek ngan mayda mga record hin panarhog ha ira lugar.
Duro naman ha pagkayana an kasubo han kag-anak han biktima nga kun diin nanawagan hin Hustisya ha pagkamatay han ira ginkokonsidera nga “Anghel”.
Hangyu naman han pira nga paryente ni Joan nga ma-death penalty an mao nga Suspek.
Guindara naman an suspek ha Department of Social Welfare Development (DSWD) tungod nga ha ilarum han balaud an mga menor de edad in diri pa pwede nga mapreso.isumat.com
