Isumat.com/8:09AM, November 26, 2020
Nawad-an hin dako nga kantidad hin salapi in usa nga doktor ha Tacloban City han madeng-goy hiya hin parupangowat ha On-Line Selling hin produkto.
Subay han blotter ha Abucay PNP Station, an biktima nga ngaranan la naton nga Dr. “Lex” in nakig-transaksyon basi pumalit hin iPod-Pro tikang hin On-Line Seller. An 31-anyos nga biktima in nagtatrabaho ha usa nga pribado nga hospital ha Tacloban.
An suspetsado in nagpakilala nga hi Kyle Gonzales Chang han Cotabato. Nagkasabot an biktima ug an nagbabaligya nga 25 Mil an presyo han marahalon nga gadget ug tumangdo an doktor nga babaydan ini.
An natabo nagpadara han salapi an biktima ha remittance center tungod han iya pagsarig han saad ni Chang nga ipapadara dayon an produkto. Nagsumat pa hi Chang nga iya na nakarawat an kabaraydan dida han Nobyembre 21 ngan nagsaad nga maabot an gadget paghagos hin duha ka adlaw.
Naghulat an biktima han pag-abot han produkto pero pagka Nobyembre 23, waray umabot nga gadget ngan han iya tawagan ha telepono an suspetsado, deri na nakokontak an numero. Iya liwat ginpruwebahan ha Facebook Messenger pero gin-“block” na hiya han suspetsado.
Hunungdan hini, nagpa blotter an doktor ha PNP Station ngan ini nga panhitabo in iimbestigaron han PNP Anti-Cybercrime Unit. #
