Isumat.com/7:29AM, November 26, 2020
“Waray angay ikabaraka ngan hul-os an pagtimangno han mga Police Trainees ha Eastern Visayas nga nagkatatapnan han Covid-19.”
Ini an pagpatapod han PNP Regional Training Center (RTC) han pamaki-anhan han iFM-RMN Tacloban kasumpay han mga bag-o nga recuit nga kapulisan nga nagpositibo han ginkakahadlukan nga kagaw. Nagsering hi Master Sgt Lalaine Rosales, tagyakan han RTC nga aada ha maupay nga kahimtang an nasabi nga Police Trainees.
Hadin Nobyembre 13, syahan nga nagpositibo an pira ha ira ngan nagtakip-takip na ini ha ira mga close contacts ha RTC paghagos hin pira ka adlaw hangtod nga umabot ini hin 25 katawo. Nagsering pa hi Rosales nga iginbalhin na ha PNP Isolation Facility an nasabi nga kapulisan ngan waray na didto ha training center.
An iba liwat nga iginka-urusa han nagkatatapnan in gin-akomodar na ha Quarantine Facility han RTC. Kasumpay hini, ginpasabot gihapon han RTC an tagsatagsa nga pamilya han kapulisan nga deri angay mahadlok kay deri papasibay-an han mga Medical Personnel han PNP an mga nagpositibo.
Sumala pa han opisyal, maupay an panlawas han mao nga Trainees ngan tulo la ha ira an nagpakita hin Mild Symptoms.
Hapagkayana, waray pa matutudlok han RTC kun diin o hin-o an nakatapon han mao nga kapulisan. Posible gihapon nga natapnan an pira ha ira tungod han ira mga aktibidadis ha gawas han training center komo kaparte han ira paghag-id.
Samtang, duha naman nga Covid Patients an naawat an kinabuhi hadin nag-agi nga adlaw, sanglit umabot na ha 86 an Total Covid-Related Deaths han rehiyon. An bag-o nga nagkamamatay amo an 52-anyos nga lalaki ha Oras, E. Samar ngan 81-anyos nga pasyente nga taga Palo, Leyte.
Tobtob han Nobyembre 25, umabot na ha 8,450 an Total Cases ha Sinirangan Bisayas kun diin 7,745 (91%) an naka-recover, samtang mayda naman 619 an Active Cases. #
